Бунтовниците во Нигер тврдат дека француската војска наводно нападнала припадници на националната гарда и го нарушила воздушниот простор на земјата.
– Позициите на Националната гарда на Нигер беа цел на француските сили во 6.30 часот – изјави Амаду Абдраман од Националниот совет за одбрана на татковината, формиран по државниот удар, кој, сепак, не презентираше никакви докази за своите тврдења.
Амдраман, исто така, тврди дека француските сили ги „ослободиле заробените терористи“ и полетале со воен авион од Нџамена, со што „намерно го прекинале“ секој контакт со контролата на летање откако влегле во воздушниот простор на Нигер.
Раководството на бунтовниците, наводно, наредило предупредување низ целата земја.
Младите луѓе во главниот град Ниамеј создаваат волонтерски одреди за да им помогнат на вооружените сили на земјата во случај на инвазија на групата земји ECOVAS, изјави за РИА Новости Умару Сисе Булкасум, потпретседател на Здружението за преродба и реформи.
CNN еден ден претходно објави дека вооружените сили на Нигер распоредиле засилување во главниот град Ниамеј за да се подготват за можна воена интервенција.
Француската радио станица RFI во вторникот изјави дека интервенцијата би можела да ја води Нигерија со поддршка на Сенегал, Бенин и Брегот на Слоновата Коска и дека армијата треба да брои 25.000 војници.
На 26 јули бунтовниците во Нигер објавија дека го соборуваат Мухамед Базум за претседател на земјата, ги затвораат границите, воведуваат полициски час, го суспендираат уставот и забрануваат политички активности на партиите.
Генералот Абдураман Тијани стана нов шеф на државата.