Британската полиција наскоро ќе добие овластувања да може да пука во терористите кои како оружје ќе кристат возило, за да се спречи нападот, соопшти Советот на полициските комесари на Британија.
Досегашните правила не им дозволуваа на вооружените полицајци да пукаат во возачот додека возилото е во движење, стравувајќи дека тоа би можело да предизвика потешки последици.
Новата тактика на полицијата во нејзината пресметка со исламските милитанти доаѓа по лондонскиот напад, кога британскиот муслиман, Халид Масуд со своето возило, возејќи со голема брзина по тротоар на мостот Вестминстер, уби четворица пешаци, по што беше застрелан.
Вакви напади, кога џихадисти користат автомобили и камиони за да убиваат невини луге по улиците и тротоарите, се случија прво во Ница, во Франција, минатото лето, каде бројот на жртвите беше најголем, а подоцна и во Берлин, во центарот на градот, пред Божикните празници и неодамна во Стокхолм, во една тамошна пешачка зона.
„Кога возилото се користи како оружје, за да убива, нема друга тактика освен да се запре по секоја цена, посебно кога станува збор за големи и тешки камиони“, се вели во полициското соопштение.
Во него се посочува дека за возилото „убиец“ да се запре ќе мора да се пука во возачот, особено што британската полиција сега располага со муниција што може да ги пробие вратите и прозорците на возилата.
„Ситуацијата (со овој вид тероризам) не натера , полицајците кои носат оружје, да станат многу поагресивни од досега“, изјави за лондонските медиуми членот на овој полициски совет, Сајмон Честерман.
Тој открива дека полициските сили во Англија и Велс ќе добијат уште 1.500 полицајци под оружје, па до 2018 година, нивниот број ќе зе зголеми на 10.500.