Високиот претставник на ЕУ за надворешна политика и безбедност Жозеп Борел, вечерва изјави дека Советодавната мисија на ЕУ во Украина (ЕУАМ) добила веродостојни информации дека просториите на нејзината теренска канцеларија во Мариупол неодамна биле погодени од руски гранати.
– Канцеларијата и опремата на ЕУАМ претрпеа големи штети. Ниту еден член на мисијата или изведувач на работи не е повреден. Остро ги осудуваме овие напади, како и секој напад врз цивили и цивилна инфраструктура, се вели во писмената изјава на шефот на дипломатијата на ЕУ.
– Бараме Русија веднаш да ја прекине воената офанзива и безусловно да ги повлече сите сили и воена опрема од целата територија на Украина, како што се бара со резолуциите на Генералното собрание на ОН и наложено од Меѓународниот суд на правдата, повтори Борел.
Извор: МИА