Американскиот државен секретар Ентони Блинкен денеска разговараше со полскиот министер за надворешни работи Збигњев Рау. Како што се дознава од соопштенијата на Стејт департментот, Блинкен синоќа имал телефонски разговор и со министерот за надворешни работи на Франција, Жан Ив Ле Дриан.
И во двата разговара, „државниот секретар повторно ги истакнал заложбите на САД за суверенитетот и територијалниот интегритет на Украина во однос на руското неиспровоцирано армиско трупање на границата“, соопшти портпаролот Нед Прајс.
Со полскиот и со францускиот министер за надворешни се дискутирало за продолжување на соработката во однос на дипломатијата со Москва, истовремено преземајќи чекори за одвраќање на понатамошна руска агресија, „брзо и силно“.
Секретарот високо го оценил лидерството на Полска во источното крило на НАТО и претседавањето со ОБСЕ.
Со Ле Дриан, Блинкен разговарал за неодамнешниот неформален состанок на министрите за надворешни работи на ЕУ во Брест, Франција одржан на 13-14 јануари, како дел од француското претседателство со Советот на ЕУ.
Двајцата исто така разговарале и за напорите за промоција на демократскиот процес во Либија.
Извор: МИА