Билансот на загинатите при уривањето на повеќекатница во главниот град на Бангладеш, Дака достигна 275 лица, а уште 61 се спасени соопштија властите во Бангладеш.
Осумкатната зграда, во која се сместени текстилни фабрики и трговски центар во индустриско предградие во Дака, се урна во средата.
Околу две илјади лица се спасени во изминатите два дена, од кои половината се ранети, а околу илјада лице се водат како исчезнати. Во зградата имало претежно жени, кои работеле во некоја од фабриките.
Неколку илјади лица протестираа синоќа во и околуДака со барање да бидат уапсени сопствениците на зградата, која се урна, како и газдите на текстилните фабрики. Некои од нив побараа смртна казна.
Трагедијата повторно го покрена прашањето за непочитувањето на стандардите за безбедност во текстилната индустрија, главен сектор на економијата на Бангладеш. Сто и дванаесет лица загинаа во пожар во текстилна фабрика во земјата пред помалку од пет месеци.