Договорот на премиерот Тереза Меј и Демократска унионистичка партија (ДУП) за парламентарна поддршка на новата британска малцинска влада, се одлага за идната недела – потврди Би-Би-Си, повикувајќи се на свои извори во северноирската партија од Белфаст.
Новото одлагање за постигнатата согласност за „договор за доверба“ меѓу ториевците и ДУП, според недентификуваниот извор, овој пат, се објаснува со „неприкладноста на моментот“, по катастрофалниот пожар во една лондонска станбена кула во која досега има десетина мртви и педесетина полесно и потешко ранети.
Изворот на кој се повикува Би-Би-Си, меѓутоа, тврди дека двете страни се „блиску до договор“ и инсистира на тоа дека не станува збор за криза во преговорите.
Според негово објаснување, двете страни се наоѓаат во фаза на финализирање на „термините и условите“ за меѓупартискиот договор.
Веста за уште едно одлагање, доаѓа по синоќешната средба на премиерот Меј и лидерот на ДУП, Арлен Фостер, во Лондон.
Претставник на Даунинг стрит 10, денеска одби да ги коментира тврдењата на британскиот јавен сервис, освен што кажа дека „веста за одлагање на објавувањето на договорот, доаѓа од другата страна“.
Доколку се покаже точно поместувањето на конечното спогодување на ториевците и на ДУП, тогаш ќе се одложи планираниот говор на кралицата Елизабета во Парламентот, што е утврден за 19 јуни, а ќе се одложи и почетокот на преговорите на Лондон со Брисел за Брегзит.
Договорот не претставува коалицирање на конзервативците со унионистите од Северна Ирска, туку само обезбедување поддршка за малцинската влада на Меј, за најзначајните прашања во парламентарната процедура, како што се говорот на кралицата, или буџетот на земјата.