Американскиот министер за финансии Скот Бесeнт изјави дека САД бараат од своите сојузници да разберат дека „Гренланд мора да биде дел од САД“.
Бесeнт им рече на новинарите дека „не е сигурен“ каква порака испраќаат осумте европски земји што одлучија да испратат војници на Гренланд и дека американскиот претседател Доналд Трамп јасно ставил до знаење дека САД нема да ја препуштат својата национална безбедност на други, објавува Гардијан.
Тој потсети дека САД ги купиле Американските Девствени Острови од Данска во Првата светска војна и дека Данска останала неутрална за време на таа војна.
Бесeнт ја обвини Велика Британија дека „ги разочарала“ САД како партнер со тоа што му го предала островот Диего Гарсија, каде што САД имаат воена база, на Маврициус.
Бесeнт рече дека би било „многу разочарувачки“ ако Швајцарија почне да ги имитира политиките на Европската Унија за „администрација, бирократија и економска склероза“.
Според него, американската влада промовира ребалансирање на меѓународната трговија, што, според него, е „одамна задоцнето“.
Тој истакна дека меѓународниот трговски дефицит на САД се намалува „со невидена брзина“ и дека трговските податоци за октомври покажуваат дека трговскиот дефицит паднал на најниско ниво од 2009 година.
Бесeнт рече дека светот е побезбеден и попросперитетен кога Америка е силна и дека растот е единствениот излез од долгот натрупан во глобалната економија.
„Можеме да растеме заедно само со проширување на трговијата“, рече Бесeнт.
Запрашан за енергијата, Бесeнт ги критикуваше европските земји за изградбата на гасоводот Северен тек 2 и купувањето руска нафта, што, според него, му дало на рускиот претседател Владимир Путин средства за финансирање на неговата војна во Украина.
Во врска со прашањето за трговските договори, Бесeнт рече дека Европа треба да ги отстрани трговските бариери во Европа, како и сопствените надворешни трговски бариери.
Кога беше замолен да ја коментира изјавата од кабинетот на францускиот претседател Емануел Макрон дека Франција сака вежба на НАТО на Гренланд, тој одговори дека Макрон треба да се фокусира на францускиот буџет, за кој рече дека е „распаднат“ и други прашања важни за францускиот народ.