Доколку Европската унија не изврши радикални реформи, тогаш еврото би можело да исчезне, изјави поранешниот италијански премиер Силвио Берлускони во интервју за Би-Би-Си.
– Неопходни се радикални промени, бидејќи во спротивен случај економската состојба ќе не принуди да се откажеме од еврото и да се вратиме кон националните валути, нагласи Берлскони, додавајќи дека „неизбалансираната економска политика“ на ЕУ го загрозува опстојувањето на еврозоната.
Берлускони во интервјуто упати критика и на сметка на поранешиот француски претседател Никола Саркози поради неговите заложби за смена на либискиот лидер Муамер Гадафи во 2011 година.
– Саркози се плашеше дека моето пријателство со Гадафи би можело да доведе до прекин на дистрибуцијата на нафта и гас од Либија за Франција. Затоа тој ги предводеше другите земји во заложбите за напад врз Либија и Гадафи, што според мене, беше голема грешка, истакна Берлускони.