Администрацијата на американскиот претседател Џо Бајден испратила таен извештај до Конгресот за својата стратегија за војната во Украина, објави денеска Ројтерс, повикувајќи се на три неименувани извори.
Стратегијата, која администрацијата на Бајден требаше да ја достави до неколку конгресни комисии, беше спомната во нацрт-законот за помош усвоен кон крајот на април, со кој на Киев му беа обезбедени речиси 61 милијарда долари.
Сепак, рокот за поднесување на тој извештај истече на почетокот на јуни, па некои членови на Конгресот рекоа дека се разочарани и размислуваат да го блокираат натамошното финансирање за војната во Украина, наведува Ројтерс.
Меѓутоа, пратениците го добија долгоочекуваниот извештај на 9 септември, но сè уште не го разгледале, изјави за Ројтерс неименуван претставник на Конгресот. Засега не се познати деталите од таа стратегија.
Ројтерс потсетува дека Вашингтон вети нов пакет со оружје, муниција и друга одбранбена помош за Киев во вредност од 250 милиони долари.
Киев долго време тврди дека ограничувањата за употребата на оружје со долг дострел ги задушуваат нејзините воени напори, но САД продолжуваат да и забрануваат на Украина да го користи тактичкиот ракетен систем со долг дострел (ATACMS) и други оружја со долг дострел испорачани од Америка за да нападне подлабоко внатре во Русија.
Киев сега дополнително стравува дека поради доцнењето на извештаите доставени до Конгресот, повторно може да дојде до одложување на испораката на оружје и ресурси во критичните моменти од војната.