Австрискиот министер за одбрана, Ханс Петер Доскоцил ги критикуваше Чешка, Словачка и Унгарија за нивниот став за миграциската криза, особено во врска со недостигот на солидарност со другите земји од Европската унија, јави дописникот на МИА од Прага.
Во интервјутото кое денеска го објави интернет страницата на германскиот портал „Шпигел онлајн“, Доскоцил вели дека е неприфатливо земјите кои добиваат толку многу финансии од фондовите на ЕУ во случај на криза да одбиваат да учествуваат во заедничко решение.
– Веќе не можеме да толерираме, оние кои примаат финансиски средства од ЕУ, земјите на кои им се исплатија толку многу пари, во случај на било каков проблем да го свртат грбот и да речат: „Не“, изјави Доскоцил.
Доскоцил додава дека тоа може да има одглас во нивните земји, но не е во согласност со изразувањето на солидарност во ЕУ.
Тој во интервјуто позитивно ја оцени одлуката на неговата земја за спроведување на годишни квоти на примање на бегалци.