По одржаните парламентарни избори во неделата и согласно Уставот на Австрија, коалициската Влада на канцеларот Вернер Фајман денеска поднесе оставка до шефот на државата Хајнц Фишер, но ќе продолжи да ги извршува функциите се до формирањето на новиот кабинет.
Фајман, кој е лидер на Социјалдемократската партија на Австрија (СПО), најави дека планира преговори за коалиција само со Народната партија (ОВП), која беше и досегашен негов партнер во владата.
Тој на прес-конференција истакна дека сака да започне интензивни разговори со ОВП, која е втора по големина партија во Парламентот.
Имајќи предвид дека претседателот Фишер денеска треба да започне разговори со претставниците на парламентарните партии, Фајман очекува следната недела да добие мандат за состав на нова влада, нагласувајќи дека дури тогаш ќе ги почне преговорите.
Коментирајќи ја одлуката на ОВП да разговара со сите партии, Фајман порача дека тоа е решение исклучиво на оваа партија.
Лидерот на ОВП Михаел Шпинделегер изрази подготвеност на неговата партија да разговара со сите партии, додавајќи дека нема однапред да се определува за која било коалиција.
СПО на парламентарните избори во неделата остана најсилна политичка сила во земјата и покрај големата загуба во однос на претходните избори.