Во Австралија денес стапи на сила законот за забрана на нацистички поздрави, нацистички сувенири и прикажување или продажба на симболи поврзани со терористички групи.
„Сега е незаконски да се изведува нацистичкиот поздрав во јавност, како и продажбата на нацистички симболи“, рече државниот обвинител Марк Драјфус.
„Новиот закон, исто така, го криминализира глорификацијата и славењето на терористичките акти“, додаде Драјфус, истакнувајќи дека австралиското законодавство испраќа јасна порака дека во Австралија нема место за оние кои го величат Холокаустот или терористичките акти.
На 6 декември, австралискиот парламент го прогласи за закон законодавниот амандман поврзан со антитероризмот (Забранети симболи на омраза и други мерки) со едногласна поддршка на претставниците.
Австралиската влада реагираше со овој закон на зголемувањето на антисемитските инциденти по избувнувањето на конфликтот меѓу Израел и Хамас.
„Ова е прв закон од ваков вид кој гарантира дека никој во Австралија нема да смее да глорифицира или да профитира од дела и симболи кои ги слават нацистите и нивната зла идеологија“, рече Драјфус.
Новиот закон, исто така, забранува јавно прикажување или трговија со симболи поврзани со забранети терористички групи како што се Исламската држава или Хамас.
Во октомври, тројца мажи беа уапсени и обвинети во Сиднеј за давање нацистички поздрав пред Еврејскиот музеј.