Авион на турската авиокомпанија Туркиш ерлајнс со 114 патници мораше принудно да слета откако беше погоден од гром од кој еден мотор се запалил, соопшти компанијата.
Никој од патниците не е повреден.
Во моментот кога беше погоден од гром авионот на релација Истанбул-Измир се подготвувал да слета во Измир. Пилотот веднаш го активирал апаратот за гаснење пожари во моторот, прогласил вонредна состојба, а потоа безбедно слетал.
Државната агенција Анадолија јави дека жителите на Измир, кои го виделе пламенот се упатиле кон аеродромот за да ги слушнат вестите.