Иранскиот потпретседател Мохамед Реза Ареф изјави дека Ормутскиот теснец му припаѓа на Иран и дека Иран „нема да се откаже од него по никоја цена“.
– Ние нема да се откажеме од Ормутскиот теснец по никоја цена. Ормутскиот теснец пред сè ни припаѓа нам. Тој отсекогаш бил наш имот, иако некое време не го користевме добро она што ни припаѓаше, рече Ареф.
Ормутскиот теснец е широк 21 наутички милји во најтесната точка, а според Конвенцијата на Обединетите нации за морското право, која Иран ја потпиша, но не ја ратификуваше, крајбрежните држави можат да бараат територијални води што се протегаат 12 наутички милји од нивните брегови.
Иран воведе блокада на Ормутскиот теснец, низ кој минува една петтина од меѓународниот извоз на нафта и течен природен гас, во март откако САД и Израел започнаа напад врз Иран на 28 февруари. Иранските медиуми претходно денес објавија дека се направени подготовки за олеснување на преминот на кинеските бродови низ Ормутскиот теснец.
Новинската агенција „Тасним“ објави дека е договорено на неколку кинески бродови да им биде дозволено да поминат низ водниот пат по барање на Пекинг, откако е постигнат договор за протоколите за управување со Ормутскиот теснец, и дека нивниот транзит започнал синоќа.