Иранскиот министер за надворешни работи, Абас Аракчи, денес изјави дека Иран не создал никакви пречки за пловидба низ Ормутскиот теснец и ги обвини САД за предизвикување блокада во регионот.
„Ормутскиот теснец е отворен за сите комерцијални бродови, но тие мора да соработуваат со нашите поморски сили“, рече Аракчи во интервју за иранската државна телевизија „Прес ТВ“, објави новинската агенција Тасним.
Тој оцени дека теснецот во моментов „страда повеќе од сè од американската агресија и блокадата што му ја наметна Америка“. „Ние не создадовме никакви пречки! Америка е таа што ја создаде блокадата“, рече иранскиот министер за надворешни работи.
Аракчи изрази надеж дека ситуацијата ќе се реши со укинување на она што го нарече „нелегална блокада“ наметната од САД.
