Министерот за надворешни работи на Иран, Абас Арагчи, оцени дека нуклеарните разговори што се одржаа денес со Соединетите Американски Држави во главниот град на Оман, Мускат, беа „добар почеток“, истакнувајќи дека понатамошните разговори ќе зависат од консултациите со лидерите на двете страни.
„Севкупно, тоа беше добар почеток, но продолжувањето зависи од понатамошните консултации во нашите главни градови и одлучувањето како да се продолжи“, рече Арагчи, според агенцијата Тасним.
Арагчи додаде дека преговорите се воделе во неколку рунди и се фокусирале на утврдување на рамката за понатамошни преговори.
Како што изјави, надминувањето на меѓусебната недоверба ќе биде клучен предизвик во продолжувањето на разговорите.
„Мораме да ја надминеме оваа недоверба. Денешната дискусија беше корисна и преговорите ќе продолжат“, рече шефот на иранската дипломатија.
Денес во Оман се одржаа индиректни преговори меѓу Иран и САД, со цел намалување на тензиите меѓу двете земји што ескалираа по бомбардирањето на нуклеарните објекти на Иран од страна на САД во јуни минатата година и насилното задушување на протестите во Иран.
Иако деталите од преговорите не беа објавени, Министерството за надворешни работи на Оман објави дека министерот за надворешни работи на таа земја, Бадр ал-Бусаиди, се сретнал одделно со својот ирански колега, Абас Арагчи, а потоа и со специјалниот претставник на САД, Стив Виткоф, и со Џаред Кушнер, зет на Доналд Трамп.
Според извештаите, разговорите имале за цел да се подготви теренот за продолжување на дипломатските преговори, но ниту една страна не дала официјални изјави за содржината на разговорите.
Разговорите во Мускат го означуваат првиот директен дипломатски состанок по воената ескалација во јуни, при што двете страни изразуваат претпазлив оптимизам во врска со идните разговори.
Египетскиот министер за надворешни работи, Бадр Абделати, нагласи дека воените решенија само ја комплицираат ситуацијата и дека разликите меѓу САД и Иран мора да се решат дипломатски.
Саудискиот министер за надворешни работи, Фајсал бин Фархан, изрази надеж за успех на разговорите во Мускат и наоѓање начин за преговори.
Кремљ ги поздрави разговорите меѓу Иран и САД во Мускат, изразувајќи надеж дека овие разговори ќе бидат плодни и ќе помогнат во намалувањето на тензиите.