Неколку воени бродови на американската морнарица денес поминаа низ Ормутскиот теснец, потврди американски функционер. Овој потег, кој не беше координиран со Иран, го означува првото поминување на американски воени бродови низ теснецот од почетокот на војната, пишува Аксиос.
Според извори, целта на операцијата била да се зголеми довербата на трговските бродови да продолжат да пловат. Операцијата е спроведена во време кога во Пакистан започнуваат мировни преговори меѓу двете страни. „Тоа е операција насочена кон обезбедување слобода на пловидба во меѓународни води“, рече американскиот функционер.
Иран, од друга страна, објави дека американскиот разорувач се повлекол од Ормутскиот теснец откако добил строго предупредување. Според иранските изјави, вооружените сили го набљудувале движењето на воениот брод од пристаништето Фуџаира и ја информирале својата преговарачка делегација за тоа, пишува Тасним.
Потоа Техеран, преку пакистански посредник, изјави дека разорувачот ќе биде цел во рок од 30 минути ако продолжи да плови кон теснецот. Набргу потоа, американскиот брод престана да се движи, а потоа се сврте, што иранската страна го припишува на својата решителна реакција и предупредувањата што ги упати.
Повторното отворање на теснецот е клучна точка од договорот за прекин на огнот меѓу САД и Иран. Овој тесен воден пат по должината на јужниот брег на Иран е од клучно значење за нормалното функционирање на глобалната економија.
Сепак, во деновите по прогласувањето на примирјето, многу малку бродови поминаа низ теснецот. Американски функционер претходно оваа недела призна дека бродовите не поминуваат поради иранско заплашување.
Претседателот Трамп објави на социјалната мрежа Truth Social дека заканата дека бродовите би можеле да „налетаат“ на морски мини е единственото нешто што Иран може да го направи за да ги одврати од минување низ теснецот.
„Сега го започнуваме процесот на чистење на Ормутскиот теснец како услуга за земјите од целиот свет, вклучувајќи ги Кина, Јапонија, Јужна Кореја, Франција, Германија и многу други“, напиша тој.