Воено транспортни авиони на САД започнаа да превезуваат француски војници и техника за поддршка на воената мисија на Франција во Мали.
Том Сондерс, портпарол на Африканската команда на вооружените сили на САД, со седиште во Штутгарт, денеска изјави дека авион „С-17“ вчера полетал од француската база во Истер до Бамако. Според него вчера биле направени два лета до главниот град на Мали, а денеска третиот. Сондерс истакна дека воздушниот мост ќе продолжи неколку дена, без да потврди колку летови ќе има, ниту колку војници и опрема ќе бидат транспортирани од американските авиони.
Друг портпарол на АФРИКОМ, Бенџамин Бенсон додаде дека САД ја снабдуваат француската мисија со разузнавачки информации. Тој одби да каже дали за оваа цел се користат беспилотни разузнавачки авиони.
Портпаролот на Генералштабот на француската војска Тиери Брукар вчера потврди дека Белгија, Велика Британија, Данска и Канада веќе и помагаат со транспортни авиони на Франција за нејзината интервенција во Мали.