Белата куќа нареди вработените во владините служби да заминат на принуден одмор откако Конгресот не успеа да постигне компромис за буџетот, пред истекување на крајниот рок (на полноќ по локално време).
– Го повикуваме Конгрес да дејствува брзо и да донесе одлука за обезбедување на привремено финансирање за да има доволно време да се изгласа буџетот и да се обнови работата на најважните јавни служби и програми, истакна Силвија Баруел, директор на буџетската служба на Белата куќа.
Првпат по 17 години САД влегуваат во нова финансиска година, која денеска почнува, без буџет. Причината е дека администрацијата на Барак Обама и републиканската опозиција во Конгресот не успеаа да се согласат за финансирање на Владата.
Претставничкиот дом вчера изгласа предлог-закон за привремено финасирање, за кој знаеше дека е неприфатлив за Белата куќа.