САД имаат информации кои укажуваат дека Северна Кореја тајно и снабдува на Русија значителен број артилериски гранати, изјави вчера портпаролот на Советот за национална безбедност на Белата куќа, Џон Кирби.
Кирби истакна дека Северна Кореја се обидува да ги скрие пратките со тоа што ќе ги премести низ земјите на Блискиот Исток и Северна Африка.
– Нашите информации ни кажуваат дека Северна Кореја врши испораки во тајност и ние следиме дали некоја од пратките стигнала до целта. Не се работи за мал број гранати, но не веруваме дека тоа е количина што би влијаела на исходот на конфликтот во Украина – нагласи Кирби.
Според неговите зборови, Вашингтон ќе се консултира со ОН за прашања од одговорност во врска со испораките.
Северна Кореја минатиот месец изјави дека никогаш не испорачувала оружје или муниција на Русија и дека не планира да го стори тоа, додека САД беа предупредени да „молчат“ и да престанат да шират гласини кои имаат за цел да го нарушат имиџот на земјата.