Организацијата Амнести Интернешенел (АИ) соопшти дека е загрижена за тоа како американската затворска служба постапува со мексиканскиот нарко бос Хоакин Ел Чапо Гусман.
Претставник на АИ побарал пристап до затворското крило со максимално обезбедување во затворот на Менхетн, каде се наоѓа Гусман, бидејќи сакал да разговара со него за извештаите дека тешките услови му штетат на неговото здравје, пренесуваат американските медиуми.
Канцеларијата на американскиот државен обвинител одби да даде коментар на овие тврдења.
Гусман (59) во јануари беше префрлен во САД за да се соочи со обвинувањата дека ја надгледувал меѓународната операција на трговија со дрога вредна повеќе милијарди долари, потсетуваат американските медиуми.
Неговите адвокати навеле дека е затворен во ќелијата 23 часа дневно и дека не му е дозволен каков било контакт со сопругата.
Обвинителството наведе дека овие мерки се адекватни за некој кој двапати бегал од затвор во Мексико.