Германската десничарска партија Алтернатива за Германија е обвинета дека ги користи своите парламентарни прашања за собирање информации што би можеле да бидат од интерес за руските разузнавачки служби, пишува Политико.
Пратеникот на АфД во парламентот во Тирингија, Ринго Милман, постојано поднесува прашања до регионалната влада во врска со транспортот на западно оружје во Украина и локалните системи за одбрана од беспилотни летала, што предизвика обвинувања од центристичките политичари дека партијата се обидува да открие чувствителни информации на Москва.
Министерот за внатрешни работи на Тирингија, Георг Мајер (СПД), рече дека АфД покажува „неверојатен интерес за критична инфраструктура и безбедносни власти“, додека АфД негира дека дејствувала по наредба на Кремљ.
АфД е позната по своите ставови што вклучуваат враќање на економските врски и намалување на воената помош за Украина, истакнува Политико.
Партијата тврди дека нејзините прашања се легитимни и дека владата не е обврзана да открива чувствителни информации.
Аналитичарите предупредуваат дека иако поединечните прашања не се проблем, збирот на прашања на АфД дава увид во транспортните правци и воената логистика.
Од 2020 година, AfD поднесе повеќе од 7.000 барања поврзани со безбедноста, вклучувајќи речиси 70 проценти од барањата во Тирингија и повеќе од 60 проценти во Бундестагот.
Експертите веруваат дека ваквите практики можат да претставуваат закана за националната безбедност, без разлика дали партијата дејствува во свој интерес или во интерес на Кремљ.