Мексиканската полиција покрај автопат, во близина на градот Монтереј, пронајде 49 обезглавени тела.
Мексиканската влада објави дека одговорноста за злочинот, кој е еден од најгрозоморните во последните неколку години во Мексико, го презеле членовите на злогласниот нарко картел Зетас.
Телата на 43 мажи и шест жени, со отсечени глави, раце и стапала, биле пронајдени покрај автопатот во општината Кадерита Хименез, во сојузната држава Нуево Леон.
Идентитетот на жртвите сеуште не е познат, а според форензичарите некои од труповите биле во фаза на распаѓање, што покажува дека злосторството било сторено пред повеќе денови или недели.
Се претпоставува дека грозоморниот чин е резултата на војната која ја водат ривалските нарко картели Зетас и Синалое.
Наркокартелот Зетас е основан од дезертери во мексиканската армија, кои претходно биле дел од Заливскиот картел, кој во минатото го контролираше нарко пазарот во северниот дел на Мексико.
Картелот Зетас е во војна со соперничкиот картел Синалое, кој го предводи најбараниот мексикански криминалец Жоакин Гузман.