Пред Градската болница „8 Септември“ собрани се стотици членови од семејствата, роднини и пријатели на повредените и загинатите од денешната автобуска несреќа што се случи на автопатот Скопје – Тетово.
Официјалните информации се дека загинати се 13 лица, но голем е бројот на тешко повредените, а семејствата тешко доаѓаат до информации. Тие чекаат било каква информација за здравствената состојба на повредените.
„Поминаа повеќе од 3 часа, информациите ги добиваме од медиумите, редно е да добиеме било какви нови сознанија“, реагираат семејствата.
Се чека и официјална информација од Министерството за внатрешни работи за тоа како се случила несреќата. Разговарано е со возачот на автобусот, кој е повреден и хоспитализиран, но е надвор од животна опасност. Министерот за внатрешни работи Оливер Спасовски се уште се нема произјаснето за случајот, бидејќи полицијата и обвинителството се на терен и работат на пронаоѓање на причините за несреќата.
Кристијан Ландов