Повеќе вредат ќебапите за кои крадецот доби три години затвор, од животот на Оливер Петровски кој загина поминувајќи улица за што возачот доби 1,5 години затвор. Ова е ставот на Бојан Петровски, брат на загинатиот кој бара правда. Тој даде свое објаснување како би се избегнала оваа сообраќајка.
Тој отворено зборува за корумпираноста на системот, контрадикторноста на четирите вештачења, ниската казна за возачот, но и провокациите кои ги добивало неговото семејство.
„Најмногу боли нечовечноста“, раскажа Бојан.
Низ што минувало неговото семејство, дали брат му има вина поради која загинал, стоел или преминувал улица во моментот кога бил прегазен, што има да му каже на неправосилно осудениот возач се дел од одговорите кои ги даде братот на загинатиот.
„За украдени 150 ќебапи имаме пресуда од три години затвор“, вели Бојан и додава: „Животот на мојот брат вреди помалку од правото на сопственост на 150 ќебапи. Бидејќи кражбата на ќебапите беше проценета на три години затвор, а смртта на мојот брат на 18 месеци затвор“.
Отворено, Бојан кажа мислење и за судијката од битолскиот суд која ја изрече пресудата, но и за обвинителката која го водеше случајот. Одговараше и на прашањето што би му кажал на возачот кој го усмрти неговиот брат возејќи со недозволена брзина.