Зекир Рамчиловиќ од име на независната пратеничка група која произлезе од ВМРО-ДПМНЕ и коалицијата рече дека 8те пратеници кои со своето гласање го овозможија отворањето на уставните измени ќе гласаат воздржано за три амандмани.
„Процесот е врзан со процесот на простување и помирување. Со нашиот глас се отвори дебата. Имаме ист однос за неопходноста од отворање на дебата. Оваа дебата да биде за добро на граѓаните и да се овозможи она што ни е единствена цел а тоа е ЕУ и НАТО“, рече Рамчиловиќ.
Координаторот на пратеничката група ВМРО-ДПМНЕ, Никола Мицески го замоли претседателот на Собранието талат Џафери за коректност.
„На 2 ноември генералниот секретар на ВМРО-ДПМНЕ испрати допис до Собранието со известување дека 7 пратеници се исклучени од партијата. Да ги преземете активности да не го користат името на ВМРО-ДПМНЕ и да ги ословувате како независни пратеници. Власта не може да си нарача опозиција“, рече Мицески.
„Генералниот секретар на ВМРО-ДПМНЕ не е пратеник и неговиот допис не произведува правни дејства. Пратениците се изјаснија со писмо дека од тој момент дека дејствуваат како независни пратеници но ме известија дека основаат нова пратеничка група. Евентуалниот спор за употребата на името не е надлежност на Собранието туку на судот“, му одговори Талат Џафери.
Наместо дебата за уставните амандмани во законодавниот дом трае докажување за тоа кој повеќе придонел за Македонија, кој се грижи за нејзината иднина, за гласањето на Референдумот.