Кандидатот за номинација на Демократската партија за американски претседател Берни Сандерс денеска одби да го признае поразот од Хилари Клинтон и вети дека ќе остане во трката и покрај тоа што неговата соперничка освои доволен број гласови од делегатите за номинација и синоќа се прогласи за кандидат на демократите за американски претседател.
– Жестоко ќе се бориме да победиме во внатрепартиските избори во Вашингтон, порача Сандерс во обраќањето до приврзаниците во Калифорнија, зборувајќи за последните прелиминарни избори што се оддржуваат следниот вторник.
Тој нагласи дека својата борба за општествена, економска, расна и еколошка правда ќе ја префрли во Филаделфија, каде следниот месец ќе се оддржи конвенцијата на Демократската партија, на која ќе биде и официјално прогласен кандидатот на оваа партија за претседателските избори во ноември.
На оваа конвенција Хилари Клинтон ќе биде прогласена за кандидат на Демократската партија за претседател на САД, бидејќи веќе има доволен број гласови од делегатите за да биде номинирана, а веќе синоќа и ја прогласи својата победа.
Меѓуоа, како што објавија американските медиуми. Сандерс истакна дека е „прилично добар во математика“. – Знам дека борбата пред нас е многу, многу тешка, но ќе продолжиме да се бориме за секој глас и за секој делегат, додаде тој.
Сандерс синоќа оствари победа на прелиминарните избори во Монтана, а веста за оваа победа стигна во текот на неговиот говор во Калифорнија, каде победи Клинтон. Покрај во Калифорнија, на вчерашните демократски прелиминарни избори, Клинтон победи и во Њу Џерси, Њу Мексико и Јужна Дакота, а Сандерс, покрај во Монтана, извјува победа и Северна Дакота.