Секретарот на рускиот Совет за безбедност Николај Патрушев, најголемиот сојузник на претседателот Владимир Путин, вети дека ќе им помогне на земјите од Латинска Америка да се спротивстават на, како што рече, американските обиди да се мешаат во нивните внатрешни работи.
Патрушев своите тврдења ги изнел во Никарагва, на чие чело е поранешниот герилец Даниел Ортега, и по состанокот со поранешниот кубански лидер Раул Кастро во Хавана.
Како што го цитира ТАСС, Патрушев вели дека земјите од Латинска Америка се добро запознаени со обидите на Соединетите држави да извршат економски и политички притисок врз оние чија политика не му одговара на Вашингтон.
„Латинска Америка останува важна зона на мирот, еден вид остров на стабилност. За нас е важно повеќе земји во тој регион да се стремат кон независни политики“, рече Патрушев во Манагва, а пренесе ТАСС.
🤝| "Es un placer recibirlo nuevamente y le agradezco el gesto de incluir a #Cuba en esta visita que realiza por América Latina", afirmó el Presidente @DiazCanelB al recibir hoy en el Palacio de la Revolución a Nikolái Pátrushev, Secretario del Consejo de Seguridad de Rusia. pic.twitter.com/cHVIcmv1e3
— Presidencia Cuba 🇨🇺 (@PresidenciaCuba) February 27, 2024
Москва, додаде тој, ќе продолжи „да дејствува во рамките на постоечките средства за да се спречи мешање во внатрешните работи на вашите земји, како и кампањи за дискредитација на нивните легитимни власти, заплашување на нивното население и дестабилизирање на нивните економии“.
Војната во Украина ја предизвика најголемата криза во односите меѓу Русија и Западот од 1962 година и кубанската ракетна криза, тврдат руски и американски дипломати.
Откако Западот воведе санкции кои американските и европските лидери ги нарекуваат најстроги санкции за големата економија, Русија се одврати од Европа и САД и ги зајакна своите врски со земјите од Азија, Блискиот Исток, Африка и Латинска Америка.
На неговата турнеја во Латинска Америка, Патрушев треба да ги посети и Боливија и Венецуела, каде што, како и во Куба и Никарагва, на власт е левичарската влада со ладни односи со Вашингтон.
Патрушев рече дека развојот на добри врски со Латинска Америка и Карибите останува „еден од клучните приоритети на Москва“.
Во Куба, Патрушев и Кастро разговарале за соработка во областа на безбедноста, соопшти рускиот Совет за безбедност, пренесе агенцијата Интерфакс.
„Николај Патрушев му потврди на Раул Кастро дека Москва останува посветена на духот на стратешкото партнерство меѓу двете земји“, се вели во соопштението.