Кирил Дмитриев, директор на Рускиот фонд за директни инвестиции (RDIF) и специјален претставник на рускиот претседател за инвестиции и економска соработка со странски земји, денес изјави дека германскиот канцелар Фридрих Мерц „се дисквалификувал од играта“ во врска со мировните преговори за Украина со неговите повици за војна и обиди за нарушување на преговорите.
„Драг Мерц, ти воопшто не си во играта. Се дисквалификуваше себеси со повици за војна, кршење на мирот, нереални предлози, самоубиство на западната цивилизација, миграција и чиста глупост“, напиша Дмитриев на социјалната мрежа X.
Германското списание „Шпигел“ објави извадоци од транскриптот од доверлив телефонски разговор меѓу европските лидери и украинскиот претседател Володимир Зеленски, кој укажа на недостаток на доверба во САД во врска со решението во Украина.
За време на разговорот, Мерц го советуваше Зеленски да биде „крајно претпазлив во наредните денови“.
„Тие си играат со тебе и со нас“, рече Мерц, осврнувајќи се на американскиот претставник Стив Виткоф и зетот на американскиот претседател, Џаред Кушнер.
Германската канцеларија во среда изјави дека нема да коментира за објавените извадоци од разговорот.
Рускиот претседател Владимир Путин во вторник во Кремљ разговараше со Виткоф и Кушнер за мировниот план на САД за Украина, објави Танјуг.
Рускиот лидер денес изјави дека американската страна ги поделила 27-те точки од планот на Трамп во четири пакети и предложила тие да се дискутираат одделно.