Претседателот на СДСМ, Венко Филипче најави кадровско освежување во партијата. Тој посочи дека на вечерашниот Извршен одбор на СДСМ, ќе побара оставка од членовите, а на следниот Централен одбор ќе се избере новиот состав на ИО на партијата.
„Ги бараме најдобрите луѓе, луѓе коишто имаат најдобар капацитет за да ја спроведат програмата којашто сметам дека граѓаните и тоа како ја заслужуваат. Веќе разговарав со добар дел од луѓето, не би шпекулирал со имиња, меѓутоа не станува збор за целосна смена, туку за парцијално освежување на тимовите и во делот на раководството на партијата на ниво на потпретседатели и во делот на Извршниот одбор“ – рече Филипче.
Тој посочи дека резултатот од локалните избори е мотив за напорна и интензивна работа во следниот период и најави активна теренска активност на СДСМ.
„Имаме тимови коишто ќе се впуштат во силна и многу интензивна теренска работа. Ќе се впуштат во изнаоѓање на нови членови коишто практично ќе знаат премин на генерациите во СДСМ од една во друга генерација, нова сила, нова енергија“, порача Филипче.