Европскиот вицепрвак Вардар е на чекор од исполнување на планот, да го заврши првиот дел од Лигата на шампионите со максимални шест победи.
На досегашните пет средби Вардар има пет победи, а во 6. коло вечерва игра со Турингер од Германија.
Вардарки обезбедија пласман во следната фаза уште од порано, а со триумф на вечерашниот дуел ќе пренесат осум бода во следната фаза од елитното натпреварување.
Таму ЖРК Вардар ќе игра во јануари и февруари 2018 уште шест натпревари со првите три екипи од Д групата.
Турингер се надева дека ќе може да помине во следната фаза, дури и со пораз од Вардар. Се ќе зависи од неделниот натпревар меѓу Ларвик и ФТЦ. Норвежанките исто така мора да освојат бодови ако сакаат да одат натаму.
Почетокот на натпреварот Вардар – Турингер е закажан за 19 часот во СЦ „Јане Сандански” во Скопје.