Во рамки на програмата за спорт, Општина Зрновци и летово по шести пат ја реализираше спортската манифестација „Спортско лето, спорт за сите“.
– Манифестацијата се одржа на новоизграденото повеќенаменско игралиште на влезот во населбата. Во изминатите десет дена секоја вечер се одржуваа по два натпревара во мал фудбал. Финалето се одржа синоќа, а победи екипата од Зрновци која го зема и победничкиот пехар, изјави градоначалникот на Зрновци Блаже Станков.
Манифестацијата „Спортско лето, спорт за сите“ се организираше по повод празникот Илинден и празникот на општина Зрновци. Учествуваа 14 спортски екипи од општините Кочани, Зрновци, Виница, Чешиново-Облешево, Пробиштип, Штип и Дојран. Од наредната година турнирот се планира да добие балкански карактер со учество на екипи од балканските земји.
Манифестацијата целосно е финансирана од буџетот на општина Зрновци.