Со првите летови на параглајдеристите и во присуство на неколку стотини љубители на екстремните спортови, во близина на гостиварското село Чегране претпладнево почна второто издание на „Гостивар параглајдинг куп 2013″.
Во натпреварувачкиот дел денеска и утре своите вештини ќе настапат педесетина параглајдеристи од Македонија, Косово и од Албанија.
Синоќа, на отворањето на манифестацијата, организаторите од летачкиот клуб „Кондор“ од Гостивар напоменаа дека натпреварот има регионален карактер и е дел од шампионатот кој годинава се организира. Тие се надеваат на добри резултати со оглед дека временските услови се поволни.
Покрај натпреварите во дисциплината прецизно слетување, ќе има и ревијален дел во кој овие учесници ќе прикажат дел од своите вештини.
Полетувањата се од планината Сува Гора, во близина на селото Корито.