Застрашувачката експлозија во кинескиот град Тјенцин, што однесе најмалку 50 човечки жртви, ја опустоши и индустриската област на овој пристанишен град.
Како што пренесуваат локалните медиуми, на удар на огнената стихија се најдоа и голем број нови возила од марките „Фолксваген“, „Хјундаи“, „Киа“ и „Рено“ што биле складирани во пристаништето.
Целосна или делумна штета претрпеле над 2.500 автомобили на брендот „Фолксваген“. Меѓу уништените возила има 1.065 модели „Фолксваген Туарег“, 257 „Тигуана“, 391 „Буби“, 114 „Голфови“, 84 „Фолксваген Ап“ и повеќе од 800 други различни автомобили на германскиот производител.
Уште поголема штета претрпеле „Хјундаи“ и „Киа“. Проценката е дека во експлозијата се уништени околу 4.000 автомобили на корејските производители.
Во едно од складиштата што било зафатено со пожарот се наоѓале и 1.500 возила на брендот „Рено“, па вкупниот број уништени автомобил во Тјенцин за сега надминува 8.000.