Во реприза на ланското финале, шампионот во НБА Мајами, повторно беше подобар од финалистот Оклахома Сити и на гостински терен го совлада со 110:100. Решавачка за победата беше првата четвртина која Мајами ја доби со 32:17.
Леброн Џејмс на седми натпревар по ред постигнува повеќе од 30 поени. Тој натпреварот го заврши со 39 поени и 12 скокови. Одлична помош имаше од соиграчите Крис Бош реализираше 20 поени со шут (10/14), додека Двејн Вејд и Реј Ален имаа по 13 поени.
Во редовите на поразениот тим Кевин Дјурант реализираше 40 поени.
На вториот натпревар одигран ноќеска, во Лос Анџелес играа „соседите“, а Клиперс ги „потопија“ Лејкерси и славеа победа од 125:101. И на овој натпревар победникот ја доби првата четвртина со 31:17.
Крис Пол имаше 24 поени и 13 асистенции, додека Блејк Грифин постигна 18 од своите 22 поена во првата четвртина. Своја вечер имаше и Чонси Билапс, со пет „тројки“ за вкупно 21 поен.
Вечерва не се играат натпревари бидејќи почнува „Ол старс“ викендот во Хјустон.
Пласман Источна конференција: Мајами 36-14 (победи-порази), Њујорк 32-18, Индијана 32-21, Бруклин 31-22, Чикаго 30-22,…
Пласман Западна конференција: Сан Антонио 42-12, Оклахома Сити 39-14, Л.А.Клиперс 39-17, Мемфис 33-18, Денвер 33-21,…