Македонскиот ракометен првак Вардар вечер од 18 часот против Веспрем ја започнува серијата од три дерби-гостувања во СЕХА-лигата.
За шпанскиот интернационалец во „црвено-црниот“ дрес Жоан Кањелјас овие натпревари ќе бидат вистински испит за формата и капацитетот на Вардар.
– Декември е тежок месец затоа што само еден од натпреварите го играме во Скопје, против Целје, а останатите се надвор и нема да бидат лесни. Поминаа само два дена по гостувањето во Киелце и веќе играме кај Веспрем. Сигурен сум дека ќе сакаат да не победат, затоа што ние ги добивме во Скопје, а потоа, пак, одиме во Брест. Ќе биде интересно да се види како тимот ќе реагира против толку добри екипи и тоа на гостински терен, вели Жоан Кањелјас.
Вардар е на врвот на табелата во СЕХА-лигата со 31 бод, девет повеќе од второпласираниот Загреб. Веспрем е дури четврти со 18, но и со четири меча помалку.
– Вистина е дека сакаме да бидеме прво место во Лигата на шампионите, бидејќи многу е важно, но во СЕХА-лигата е поинаку. Ако сме на едно од првите четири места се пласираме на фајналфор-турнирот, а тоа е нашата цел. Засега сме први и би било убаво да остане така, кога веќе не успеавме во ЛШ, да го задржиме првото место во СЕХА до Божик, но за тоа мора да играме одлично, дополни шпанскиот бек.