На својата интернет страница УЕФА објави дека е отворена дисциплинска постапка против Хрватскиот фудбалски сојуз заради инцидентот на натпреварот меѓу Хрватска и Италија одигран петокот во Сплит.
Во соопштението од европската куќа на фудбалот се наведува дека дисциплинскиот оддел има сомнежи за расистичко однесување заради кукастиот крст што се гледаше на тревникот за време на ТВ преносот.
Со овој потег е нанесен голем удар за угледот на ХФС, а срамната слика ги преплави светските медиуми. Нема сомнеж дека по бројните осуди од сите страни ќе следува ригорозна казна од страна на УЕФА – изјавија претходно од врвот на ХФС.
На Хрватскиот фудбалски сојуз му се заканува голема финансиска казна од УЕФА, а на репрезентацијата одземање бодови или дури и суспензија, со оглед на тоа дека се работи за повеќекратно повторување на прекршоците.
Одлуката за казната на УЕФА ќе биде донесена на 16 јули.