Ракометарките на ЖРК Вардар ја остварија и третата победа во групата оваа сезона во Лигата на шампионите откако вечерва на гости го совладаа дански Митјиланд со 25:15 (12:11). Со овој триумф „вардарки“ останаа на првото место на табелата во групата.
До средината на првиот дел минамално водство имаше Митјиланд, а ЖРК Вардар потоа го презеде водството и на полувремето имаше гол предност (12:11). На стартот од вториот дел ЖРК Вардар одигра одлично во одбраната кога домашниот тим за 17 минути постигна само еден гол и македонскиот шампион водеше со 20:12.
Андреа Лекиќ со шест голови беше најефикасна на натпреварот, Ања Алтхаус постигна 4 голови, а Сара Ристовска и Барбара Лазовиќ по три. Одлична на голот беше Амадин Лејно која имаше 19 одбрани.
На вториот дуел од групата Ѓер го совлада Хипо со 37:16.
На чело на табелата е ЖРК Вардар со 6 бодови, колку што има и Ѓер, Митјиланд остана со 4, а без бод е Хипо.
Во следното коло ЖРК Вардар гостува на унгарски Ѓер на 14 ноември.