Српскиот клуб Партизан останува без тренерот Гордан Петриќ кој доставил оставка до раководството на клубот откако неговиот тим вчера беше елиминиран од Шерид Тираспол во Конференциската лига на УЕФА. „Црно-белите“ беа елиминирани откако во Белград загубија со 1:3, иако претходно славеа во Молдавија со 0:1.
Гордан Петриќ понудил оставка и најавил дека сака веднаш да го напушти тимот, со оглед дека ги известил играчите за својата намера, но подоцна по разговорот со луѓе од клубот наводно се договориле да остане на клупата на Партизан до мартовската првенствена пауза, за да има време клубот да ангажира нов тренер.
Како дополнителна причина за својата одлука Гордан Петриќ го навел „влошувањето на неговата здравствена состојба поради постојаниот стрес на кој бил изложен претходните месеци“.
Тоа би требало да значи дека Гордан Петриќ сепак ќе ги води „црно-белите“ в недела против Раднички Крагуевац, но и на „вечното дерби“ против Црвена Звезда.
Извор: Топспорт