Јапонската компанија „Тојота“ во 2015 година продала 10,15 милиони автомобили ширум светот и на тој начин го задржа приматот на автомобилскиот пазар пред групацијата „Фолксваген“ и „Џенерал Моторс“ (ГМ).
Иако во 2015 година испорача за 0,8 отсто помалку возила отколку во 2014 година „Тојота“ веќе четврта година по ред „им бега“ на најблиските ривали во трката за производител „број 1“ во светот.
„Фолксваген“, компанијата што во првата половина на 2015 година се закануваше дека ќе ги престигне Јапонците, забележа пад во продажбата од два отсто (9,9 милиони продадени автомобили) главно заради септемврискиот дизел скандал и се наоѓа на втора позиција. На послабиот резултат на германскиот концерн влијаеше и забавувањето на кинескиот пазар на автомобили.
Трета компанија е американскиот „Џенерал Моторс“ со 9,8 милиони продадени возила во 2015 година. Оваа компанија е единствената од големата тројка која во годината зад нас забележа раст на испораките, иако за само 0,2 отсто.