Кошаркарите на Тенерифе (Шпанија) го освоија пехарот во ФИБА Лигата на шампионите откако синоќа во финалето на „фајнл фор“ турнирот го победија Банвит од Турција со 63:59. Натпреварот во целиот тек беше изедначен и нијанси го решија победникот, а Тенерифе ја искористи и предноста на домашен терен.
На клупата на турскиот тим Банвит без пехарот останаа тренерите Македонци Сашо Филиповски и Бобан Митев.
Најефикасни кај победниот беа Мариус Григонис со 18 поени и Девин Вајт со 14, а кај Банвит Џордан Теодор постигна 17 поени, а ја доби и наградата за најкорисен играч на првото издание на Лигата на шампионите.
Во дуелот за третото место француската екипа Монако ја победи Венеција од Италија со 91:77.