По десетдневните подготовки во Маврово младинската ракометна репрезентација на Македонија денеска има слободен ден, а избраниците на селекторот Илија Темелковски во Скопје ќе одработат уште неколку тренинзи до заминувањето за Катар (понеделник) каде ќе бидат одиграни два контролни натпревара.
Македонија ќе биде дел од Светското првенство за младинци (играчи до 21 година) што ќе се одржи во Алжир од 18 до 30.јули.
– Одработевме добри подготовки во Маврово. Овој дел е секогаш тежок бидејќи акцент се става на физичката подготвеност, а работевме и на тактички план што ќе биде акцент и во следните денови од подготовките. Првиот натпревар на едно првенство е секогаш најважен. Играме против Русија во првото коло. На последното Европско првенство (на оваа генерација), токму против Русија ја имавме единствената победа. Со триумф над нив и потоа над Буркина Фасо (противник во 2.коло од групата) ќе биде полесно во пресрет на дуелите со Бразил, Шпанија и со Тунис. Потребно е играчите да бидат дисциплинирани и да се придржуваат до тактиката. Пласман во осминафиналето треба да биде очекуван исход, а потоа се играат елиминации и се може да се случи. Ако може да бираме би ги одбегнал Хрватска и Исланд, а со сите други ривали би можеле да се надигруваме во осминафиналето, па и со домаќинот Алжир, истакна Темелковски.
Утре и задутре репрезентацијата ќе тренира во Скопје (сала Автокоманда). Во текот на утрешниот ден Темелковски ќе се реши кои 16 играчи од 19 кои беа во Маврово ќе патуваат за Катар. Нашата селекција за Алжир ќе патува на 17.јули.
Првиот натпревар Македонија на младинското Светско првенство го игра на 18.јули против Русија.