Општина Зрновци во рамки на програмата за спорт и ова лето шести пат ја реализира спортската манифестација „Спортско лето, спорт за сите“, наменета за жителите од општината и за жителите на соседните општини од регионот.
– Манифестацијата почна синоќа со спортскиот натпревар кој се одржа на новоизграденото повеќенаменско игралиште на влезот во населбата. Секоја вечер ќе се одржуваат по два натпревари во мал фудбал, а финалниот натпревар ќе биде на 2 август, на Илинден, празникот на општината, изјави градоначалникот на Зрновци Блаже Станков.
На турнирот учествуваат 14 спортски екипи од општините Кочани, Зрновци, Виница, Чешиново-Облешево, Пробиштип, Штип и Дојран. Од наредната година турнирот се планира да добие балкански карактер со учество на екипи од балканските земји.
Во рамките на проектот „Спортско лето, спорт за сите“ ќе се реализира и турнир во шах и велосипедска трка. На најуспешните општината ќе им додели пехари и парични награди. Манифестацијата целосно е финансирана од буџетот на општина Зрновци.