Ракометарите на Вардар со победа ја почнаа новата сезона во Лигата на шампионите, откако синоќа на гостувањето кај Целје, остварија тешка но важна победа со 27:26 (12:12).
„Црвено-црните“ предводени од одличниот голман Арпад Штербик кој натпреварот го заврши со 21 одбрана, и Тимур Дибиров кој постигна 11 голови ги освоија посакуваните три бода кои може да бидат и решавачки во натамошниот дел од сезоната во групната фаза.
Вардар имаше добар почеток, но по водството од 2:0 им ја препушти иницијативата на домаќините. Целје со серија од 5:1 поведе со 6:3, а подоцна имаше и 11:5 што беше нивна најголема предност. Вардарци по тајм-аутот на тренерот Раул Гонзалес ги консолидираа своите редови и на полувреме се отиде со нерешен резултат 12:12.
Во вториот дел Целје повторно го презеде водството кое во еден момент изнесуваше 19:16. Тогаш Вардар заигра поцврсто во одбраната, Штербик продолжи со извонредните одбрани, а во нападот Дибиров, Алекс Душебаев и Немања Прибак беа незадржливи за конечни 27:26 за македонскиот вицепрвак.
Вториот македонски претставник во Лигата на шампионите, тимот на Металург, вечерва од 19 часот во СЦ „Борис Трајковски“ во Скопје го пречекува ПСЖ.