Шпанија, Грција, Словенија и Естонија ќе бидат домаќини на 43-то Европско првенство во кошарка во 2029 година, објави денес Меѓународната кошаркарска федерација (ФИБА).
Групната фаза ќе се игра во Мадрид, Атина, Љубљана и Талин, додека финалето на Европското првенство ќе се одржи во шпанската престолнина.
Според шпанските медиуми, првиот натпревар од првенството ќе се игра на стадионот „Сантијаго Бернабеу“ пред 80.000 луѓе, пренесува Танјуг.
„Возбудени сме што ќе бидеме домаќини на Европското првенство во 2029 година во некои од најдобрите европски кошаркарски дестинации, секоја со силна кошаркарска култура и јасна посветеност на организирање на извонреден настан. Со нетрпение очекуваме да соработуваме со земјите домаќини за да обезбедиме успешен и незаборавен турнир за тимовите, навивачите и партнерите“, изјави претседателот на ФИБА Европа, Хорхе Гарбахоса, според веб-страницата на ФИБА.
Европското првенство оваа година ќе се одржи во Латвија, Полска, Финска и Кипар од 27 август до 14 септември.