Македонските претставници Вардар и Металург се сретнаа на стартот од регионалната ракометна СЕХА лига.
Во дуелот од 1.коло синоќа во СЦ „Борис Трајковски“ двете екипи освоија по еден бод откако конечниот резултат беше 28:28 (14:14).
Вардар во финишот на натпреварот влезе со предност од три гола разлика, но во последната минута Металург беше поблиску до победата кога преку Златко Мојсоски од пенал поведе со 28:27.
Сепак, Дибиров во последните секунди изедначи на 28:28.
Металург натпреварот го одигра без неколку стандардни играчи: браќата Маркоски, Наумче Мојсоски, Ренато Вугринец, Дарко Станиќ и Ванчо Димовски.
Ова беше првиот од неколкуте натпревари што оваа сезона ќе ги одиграат македонските екипи, а ќе играат во СЕХА лигата, Лигата на шампионите, домашното првенство и евентуално во домашниот куп.
На другите натпревари од 1.коло: Борац – Ловќен 26:33, Партизан – Војводина 23:25 и Мешков Брест – Татран Прешов 28:30.
Последниот натпревар од стартното коло Загреб КО – Нексе е закажан за 10 септември (вторник).