Македонската ракометна репрезентација е блиску до пласман на Европското првенство кое ќе се одржува во 2022 година откако во второто коло од квалификациите славеше на гостувањето против Швајцарија со 23-25.
Швајцарците се наши главни ривали за второто место во групата, но нашите ракометари денеска славеа и петти пат во низа против истиот ривал, пред се благодарение на извонредната одбрана на чело со голманите Митревски и Томовски. Во клучен момент во нападот во ритам влезе и Гоце Георгиевски, кој постигна неколку важни погодоци кога се решаваше победникот на оваа средба.
Кире Лазаров повторно беше прв стрелец на Македонија со шест погодоци, пет постигна Стоилов, а по четири пати прецизни беа Георгиевски и Кузмановски, за овој огромен триумф со кој широко се отвораат вратите за пласман на ЕП 2022.
Во воведната рунда од квалификациите, македонските ракометари забележаа убедлива победа над Финсkа и по две одиграни кола имаат максимални четири бода идентично како и фаворитот во групата Данска. Нашиот национален состав во продолжението од квалификациите, во март следната година ќе се соочи токму со Данците.