Македонската ракометна репрезентација без никакви проблеми ја завери визата за Светското првенство 2027, откако вечерва во Скопје убедливо ја совлада Словачка со 38-23 и со доминантна игра го потврди пласманот на мундијалот во Германија.
По триумфот во првиот натпревар во Прешов, избраниците на селекторот уште поубедливо славеа на домашен терен и во голем стил обезбедија осми последователен настап на светските шампионати.
Македонија од самиот почеток го наметна своето темпо и брзо стекна висока предност. Со фуриозен старт нашите ракометари поведоа со 10-3, разлика идентична на онаа со која победија на првиот натпревар. До полувремето, Македонија контролираше целосно и на пауза замина со сигурни 18-11.
Доминацијата продолжи и во вториот дел. Македонија првпат стигна до двоцифрена предност при 23-13, по што стана јасно дека Словачка нема сили за пресврт. Со сигурна игра во одбраната и одлични интервенции на голманите, македонските ракометари до крајот само ја зголемуваа разликата за конечни 38-23.
Најефикасен во македонскиот состав беше Филип Кузмановски со 11 погодоци, Велковски постигна шест, додека Лазаревски додаде пет гола.
Ова е вкупно десетти настап на Македонија на Светските првенства, а осми во низа – уште една потврда за континуитетот на македонскиот ракомет на најголемата светска сцена.