Со завршувањето на шампионатот на Африка, пополнета е групата за олимписките квалификации во која ќе игра и македонската ракометна репрезентација.
За пласман на Олимпијадата 2016 во Рио, Македонија (деветто пласирана од СП во Катар) ќе се бори со Полска (третопласирана од Мундијалот во Катар), Тунис (втор од шампионатот на Африка) и Чиле (трет од шампионатот на двете Америки).
Натпреварите од олимписките квалификации ќе се играат од 7-10 април, а двете првопласирани реперезнтации од секој турнир ќе изборат учество на игрите во Бразил.
Ќе се играат три квалификациски турнири:
Група 1: Полска (3.место СП), Македонија (9.место СП), Чиле (3.место Америка), Тунис (2.место Африка).
Група 2: Шпанија или Данска, Словенија (8.место СП), Иран (2.место Азија), Шведска (8.место Европа).
Група 3: Данска или Хрватска или Германија (две од трите селекции), Норвешка (3/4.место Европа) и Бахреин (3.место Азија).
Домаќините на турнирите дополнително ќе бидат одредени.
Досега пласман на Олимписките игри имаат обезбедено: Бразил (домаќин), Франција (светски првак), Катар (шампион на Азија), Египет (шампион на Африка), Аргентина (вицешампион на Америка). Директен пласман ќе обезбеди и европскиот шампион Шпанија или Германија.