Македонскиот вицепрвак Металург, вечерва, во СЦ „Борис Трајковски“ го победи најбогатиот светски ракометен клуб, Пари Сен-Жермен со 28:26.
Преку 7.000 навивачи на Металург со овации ја наградија борбената игра на своите миленици кои имаа безброј исцрпувачки дуели со фаворизираните парижани.
И покрај тоа што домаќините настапија ослабени поради неиграњето на Филип Миркуловски, сепак неговото отсуство беше надополнето од останатите играчи, а пред се, од Ренато Вугринец, кој постигна девет голови и беше најефикасен на теренот.
Во победата со по четири погодоци свој придонес имаа Дејан Манасков, Наумче Мојсоски, Ванчо Димовски и Гоце Георгиевски. На голот на Металург извонреден беше Дарко Станиќ со 18 одбрани.
Кај ПСЖ најефикасен беше Фахрудин Мелиќ со шест голови.
На другите две средби од групат Ц во Лигата на шампионите: Динамо Минск – Вардар 26:24, Барселона – Вакер Тун 45:26.
По одигрување на овој круг, Металург е лидер во оваа група со две победи и како водечки на табелата во следното коло ќе и гостува на Барселона.